काठमाडौँ । भारतको विशेष अदालतले सन् २००८ मा अहमदाबादमा भएको श्रृङ्खलाबद्ध विस्फोटको सुनुवाइ गर्दै ऐतिहासिक फैसला सुनाएको छ ।

भारतीय संचारमाध्यम एएनआईका अनुसार शुक्रबार मुद्दाको सुनुवाइ गर्दै अदालतले ४९ दोषीमध्ये ३८ जनालाई मृत्युदण्डको सजाय सुनाएको छ । भने बाँकी ११ जनालाई अदालतले जन्मकैदको सजाय सुनाएको छ ।

२००८ अहमदाबाद श्रृङ्खलाबद्ध विस्फोटहरूमा ५६ जनाको मृत्यु भएको थियो भने लगभग २०० जना घाइते भएका थिए।

2008 Ahmedabad serial bomb blast case | A special court pronounces death sentence to 38 out of 49 convicts pic.twitter.com/CtcEWGze2z

— ANI (@ANI) February 18, 2022

अहमदाबाद सिरियल ब्लास्ट

सन् २००८ जुलाई २६का दिन गुजरातको अहमदाबाद सहरमा ७० मिनेटभित्रै एकपछि अर्को २१ वटा बम विष्फोट भएका थिए । जसमा ५६ जनाको ज्यान गएको थियो र २०० भन्दा बढी मानिसहरू घाइते भएका थिए।

उक्त घटनाको इन्डियन मुजाहिद्दीन र हरकत-उल-जिहाद-अल-इस्लामी नामक चरमपन्थी संगठनले यी विस्फोटको जिम्मेवारी लिएको थियो।

गुजरात एटीएस (एन्टी टेररिस्ट स्क्वाड) ले विस्फोटका संदिग्ध मुफ्ती अबु बशीरसहित नौ जनालाई पक्राउ गरेको थियो । सन् २०१६ मा झण्डै आठ वर्षपछि विस्फोटका अर्का आरोपी नासिर रंगरेज पनि पक्राउ परेका थिए ।

विस्फोट लगत्तै गुजरातको सुरेन्द्रनगर जिल्लाबाट हुसेन इब्राहिम, हेल मोहम्मद र अब्दुल कादिरसहित तीन जनालाई पक्राउ गरिएको थियो।

यी विष्फोटहरूको सम्बन्धमा दायर गरिएको आरोपपत्रमा सिमीका मुफ्ती बशर, सफदर मंसूरी र सफदर नागोरी बाहेक ५० जनालाई आरोपी राखिएको थियो।