काठमाडौं । पूँजी बजार क्षेत्रको नियमनकारी निकाय नेपाल धितोपत्र बोर्डकाे अध्यक्षमा रमेश हमाल नियुक्त भएका छन् । बिहीबार बसेको मन्त्रिपरिषद् बैठकले बोर्डकाे अध्यक्षमा हमाललाई नियुक्त गरेको हो। यसअघि राष्ट्रिय योजना आयोगका उपाध्यक्ष विश्व पौडेल संयोजकत्वको छनोट समितिले तीन जनाको नाम सिफारिस गरेको थियो ।

छनोट समितिले हमालसँगै नेपाल राष्ट्र बैंकका पूर्वकार्यकारी निर्देशक डा. गोपाल भट्ट र बोर्डमै कार्यरत कृष्ण पोखरेलको नाम छनोट समितिले सिफारिस गरेको थियो । यस्तै, आज बसेको मन्त्रिपरिषदको बैठकले गृहमन्त्रालयका सहसचिव मुकुन्दप्रसाद निरौलालाई सचिवमा बढुवा गर्ने निर्णय गरेको छ। यसैगरी आजको बैठकले नेपाल प्रहरीमा तीन जना एआईजीको दरबन्दी थप गर्ने निर्णय गरेको छ।