सप्तरी  । सप्तरीमा ट्याक्टर दुर्घटना हुदाँ एक जनाको मृत्यु भएको छ । डाक्नेशवरी नगरपालिका वडा नम्वर ९ स्थित महुकी पत्थरगाडामा ट्याक्टर दुर्घटना भएको प्रहरीले जनाएको छ । सोही दुर्घटनामा दुई जना गम्भीर घाइते भएका छन् ।

अर्नाहाबाट पत्थरगाढातर्फ गइरहेको स.१ त ६१०८ नम्वरको रड लोड गरिएको ट्याक्टर सोमबार राति आफै अनियन्त्रित भएर दुर्घटना भएको प्रहरीले जनाएको छ । दुर्घटनामा सप्तरीको छिन्नमस्ता गाउँपालिका वडा नम्वर ३ का २७ वर्षीय सन्तोष कुमार सदाको मृत्यु भएको सप्तरीका प्रहरी प्रवक्ता माधव प्रसाद काफ्लेले जानकारी दिए।

दुर्घटनामा गम्भीर घाइते भएका सदाको उपचारको लागि राजविराजस्थित गजेन्द्रनारायण सिंह अस्पतालमा भर्ना गरिएको थियो । उपचारकै क्रममा उनको मृत्यु भएको प्रहरीको भनाई छ ।

सोही दुर्घटनामा छिन्नमस्ता गाउँपालिका वडा नम्वर ३ बस्ने २९ वर्षीय श्रीप्रसाद मण्डल र १८ वर्षीय युवराज सदा गम्भीर घाइते भएका छन् । घाइते दुवै जनाको राजविराजस्थित गजेन्द्रनारायण सिंह अस्पतालमा उपचार भइरहेको प्रहरीले जनाएको छ ।

दुर्घटनाबारे थप आवश्यक अनुसन्धान कार्य भइरहेको सप्तरी प्रहरीले जनाएको छ ।