काठमाडौं । भारतीयहरुसँग मिलेर डेढ करोड बराबरको नक्कली मदिरा बिक्री गरेको आरोपमा पक्राउ परेका विइङ ह्युम्यानका सञ्चालक सन्तोषचन्द्र बख्रेललाई धरौटीमा छाड्न आदेश भएको छ ।

महानगरीय प्रहरी अपराध महाशाखा स्रोतका अनुसार मंगलबार राजश्व अनुसन्धान विभागले बख्रेललाई १ करोड ६५ लाख रुपैयाँ धरौटीमा छाड्न आदेश दिएको हो ।

विभागले उनीसँगै पक्राउ परेका रविन पाख्रिनलाई १ करोड ३८ लाख रुपैयाँ धरौटीमा छाड्न आदेश दिएको छ । शैलेश पन्त र नारायणप्रसाद घिमिरेलाई चाहिँ ६ लाख रुपैयाँ धरौटी माग गरेको महाशाखा स्रोतको भनाइ छ।

अर्को पनि पढ्नैपर्ने

भारतीयसँग मिलेर डेढ करोडको नक्कली मदिरा बिक्री, बख्रेल मुख्य योजनाकार

महाशाखाले गत माघ १६ गते ‘अप्रेशन लिमा’मार्फत् बख्रेलसहित चारै जनालाई पक्राउ गरेको थियो। त्यतिबेला उनीहरुको साथबाट नक्कली रेड लेबल, चिभास र अस्सुलुट भोड्का समेत बरामद गरिएको थियो।

पछि बख्रेलको गोदाममा छापा मारेर प्रहरीले करोडौं राजश्व छलीमार्फत् भित्रिएका गुणस्तरहीन सुर्तिजन्य पदार्थ र कस्मेटिक सामानहरू बरामद गरेको थियो ।

अर्को पनि पढ्नैपर्ने

करोडौं राजश्व छलीमार्फत् भित्रिएका गुणस्तरहीन सुर्तिजन्य पदार्थ र कस्मेटिक सामानहरू बरामद

महाशाखाका एसएसपी वसन्तबहादुर कुँवरका अनुसार विभागले धरौटीमा छाड्न आदेश दिएसँगै चारै जनालाई थुनामुक्त गरिएको छ । तर, बख्रेलको हकमा भने औषधि व्यवस्था विभागमा पनि अर्को मुद्दा भएकाले त्यता बुझाइएको छ ।

लागूऔषध नियन्त्रण ब्यूरोसँग संयुक्तरुपमा चलाइएको अपरेशनमा बख्रेलको साथबाट प्रतिबन्धित औषधि पनि बरामद भएको थियो । विभागले बख्रेलविरुद्ध ५ दिन म्याद लिएर अनुसन्धान गरिरहेको कुँवरको भनाइ छ ।