काठमाडौँ। महानगरीय प्रहरी अपराध महाशाखाले करोडौंको राजश्व छली गर्दै भारतबाट नक्कली मदिरा आयात गर्ने ठूलो गिरोहलाई पक्राउ गरेको छ।

पक्राउ पर्नेहरुमा पर्सा गादी-८ घर भइ काठमाडौँ कपन बस्ने ३९ बर्षीय सन्तोषचन्द्र बख्रेल, काठमाडौं कागेश्वरी-६ का ३० बर्षीय शैलेन्द्र पन्त, पर्सा सुवर्णपुर-५ घर भइ काठमाडौँ हाँडीगाउँ बस्ने २८ बर्षिय रवीन पाख्रिन र सर्लाही वरहथवा-०९ घर भइ चाबहिल बस्ने ३८ बर्षीय नारायणप्रसाद घिमिरे रहेका छन् ।

महाशाखाका अनुसार उनीहरुको साथबाट नक्कली रेड लेबल, चिभास र अस्सुलुट भोड्का समेत बरामद गरिएको छ । काठमाडौंको रामकोट, बानेश्वर र कपन क्षेत्रबाट २९६ कार्टुन मदिरा बरामद गरिएको महाशाखाको भनाइ छ।

बरामद मदिराको बजार मूल्य एक करोड ५० लाख रुपैयाँ बराबर रहेको महाशाखाले जनाएको छ । भारतबाट मदिरा चोरी पैठारी गरी नेपाल ल्याई कारोबार गर्ने गरेको भन्ने गोप्य सूचनाको आधारमा महाशाखाले मदिराविरुद्धको अपरेसन चलाएको थियो। उक्त अप्रेशनलाई ‘अप्रेशन लिमा’ नाम दिएको थियो ।

भारतीय र नेपाली नागरिकको मिलेमतोमा सो मदिराहरू भारतबाट नेपाल भित्र्याउने गरेको अनुसन्धानमा खुलेको महाशाखाको भनाइ छ । यस कारोबारका मुख्य योजनाकार बख्रेल रहेको अनुसन्धानमा खुलेको महाशाखाको दाबी छ ।

महाशाखाले बरामद गरिएको मदिराको गुणस्तर परीक्षणका लागि पठाएको र  चारै जनालाई थप अनुसन्धान तथा कारवाहीको लागि राजश्व अनुसन्धान विभाग, हरिहरभवन ललितपुर पठाइएको महाशाखाले जनाएको छ।