काठमाडौं। सरकारले कोरोना भाइरस (कोभिड–१९) संक्रमण रोकथाम तथा नियन्त्रणका लागि लकडाउनलाई कडाइ गर्ने निर्णय गरेपछि प्रदेश दुई प्रहरीले त्यसको कार्यन्वयन थालेको छ।

लकडाउनलाई बलियो बनाउन प्रदेश दुई प्रहरी कार्यालय अनुगमन र निरीक्षणमा खटिएको छ । लकडाउनकै अनुगमनका लागि दुई नम्वर प्रदेश प्रहरी कार्यालयका प्रमुख डिआईजी धिरजप्रताप सिंहले मंगलबार र बुधबार सर्लाही,रौटहत र धनुषा जिल्लाका बिभिन्न स्थानहरुमा निरीक्षण गरेका थिए।

नेपाल र भारत लकडाउनमा रहेका बेलामा सिमा क्षेत्रमा हुन सक्ने संभावित आपराधिक गतिविधीको पनि सुक्ष्म रुपमा नियाल्दै सुरक्षा सर्तकता बढाइएको डिआईजी सिंहले वताएका छन्।