रामनारायण यादव / जनकपुरधाम । धनुषामा डियुटीमा खटिएका प्रहरी टोलिमाथि लुटेरा समुहले आक्रमण गरेको छ । जिल्लाको बटेश्वरमा गाउँपालिका वडा नम्वर ४ मा मंगलबारराति लुटेरा समूहले असई मनोज पोखरेलमाथि आक्रमण गरेका हुन् ।

धनुषाका एसपी वसन्त रजौरेका अनुसार आक्रमणबाट असई पोखरेल घाइते भएका छन् । उनलाई उपचारका लागि प्रादेशिक अस्पताल जनकपुर लगिएको जनाइएको छ। असई पोखरेलको टाउकोमा १२ वटा टाँका लागेको छ ।

भारतबाट फर्केर ससुराली बटेश्वर जाने क्रममा लुटेरा समूहले महोत्तरीको भंगहा नगरपालिका वडा नम्वर ७ का अमित पासमानलाई लुटपाट गरेका थिए । घटनास्थल पुगेर संलग्नहरूलाई पक्राउ गर्न खोज्दा असई पोखरेलमाथि आक्रमण भएको बताइएको छ ।

लुटपाट गर्ने व्यक्तिलाई पक्राउ गरि ल्याउने क्रममा घेरेर केही व्यक्तिले असई पोखरेलमाथि आक्रमण गरेको एसपी रजौरले बताए । घटनामा संलग्न पाँच जनालाई नियन्त्रणमा लिएको र थप अनुसन्धान भइरहेको जिल्ला प्रहरी कार्यालय धनुषाले जनाएको छ ।