काठमाडौं । राजधानीको ठमेल नजिक केशरमहलस्थित केशर पुस्तकालयबाट बहुमूल्य पुरातात्विक बस्तुहरु हराएको छ।

महानगरीय प्रहरी वृत्त दरबारमार्गका डीएसपी विश्वराज खड्काका अनुसार सोमबार दिउँसो पुस्तकालय परिसरबाट पुरातात्विक वस्तुहरु हराएका हुन्।  विसं  २०७२ सालको भूकम्पपछि भत्किएको भवनको जीर्णोद्वार गरिँदै गर्दा उक्त बस्तुहरु हराएको डीएसपी खड्काले बताए।

प्रहरीको प्रारम्भिक अनुसन्धान र पुस्तकालय इन्चार्ज स्रोतका अनुसार उक्त भवनबाट एउटा बाघको छाला र दुईवटा तरबार हराएको छ।साथै, अन्य बस्तुहरु पनि हारेको आशंका गरिएको छ।

अहिले दरबारमार्गको प्रहरी टोलीले घटनास्थलमा मुचुल्का उठाएर अनुसन्धान थालेको डीएसपी खड्काको भनाइ छ।

यसअघि केशरमहल नजिकै रहेको नारायणहिटी दरबार संग्रालयभित्र पनि पुरातात्विक बस्तुहरु चोरीको प्रयास भएको थियो। घटनामा एक युवकले काँचभित्र रहेको खुकुरी निकाल्न उक्त सिसा फोरेका थिए।