काठमाडौं । पछिल्लो केही दिन यता कोरोना संक्रमितको संख्या ह्वात्तै बढ्न थालेको छ । यद्यपी शुक्रबार भन्दा आज भने संक्रमितको संख्या केही कम देखिएको छ ।
शुक्रबार ५ हजार ८७ जनामा कोरोना संक्रमण पुष्टि भएको थियो भने आज ४ हजार ६३६ जनामा कोरोना भाइरस संक्रमण पुष्टि भएको छ ।

स्वास्थ्य तथा जनसंख्या मन्त्रालयका अनुसार १० हजार ४१२ पीसीआर परीक्षणमा ३ हजार ७०३ र ४ हजार १४४ एन्टिजेन परीक्षणमा ९३३ जना गरी ४ हजार ६३६ जनामा कोरोना संक्रमण पुष्टि भएको हो ।

पछिल्लो २४ घण्टामा १४ हजार ५५६ जनामा कोरोना परीक्षण गरिएको थियो। देशभर २१ हजार ५ सय ८४ जना कोरोनाका सक्रिय संक्रमित छन्।

पछिल्लो २४ घन्टामा कोरोना संक्रमणबाट ४ जनाले ज्यान गुमाएका छन् भने ३५० जना संक्रमणबाट मुक्त भएका छन्।

काठमाडौं उपत्यकामा मात्रै २ हजार २१९ संक्रमित थपिएको मन्त्रालयले जनाएको छ । स्वास्थ्य तथा जनसंख्या मन्त्रालयका अनुसार काठमाडौंमा १५९१, भक्तपुरमा १४२ र ललितपुरमा ४८६ संक्रमित थपिएका छन्।