काठमाडौं । पाकिस्तानका पूर्व प्रधानमन्त्री नवाज शरिफलाई पक्राउ गर्न पूर्जी जारी गरिएको छ ।

समाचार संस्था एएनआईका अनुसार ३४ वर्ष अघिको जग्गा किनबेच मामिलामा पाकिस्तानको नेशनल एकाउन्टेबिलिटि ब्यूरो (एनएबी) ले शरिफलाई पक्राउ गर्न पूर्जी जारी गरेकाे हो ।

जङ समूहका प्रधान सम्पादक मिर शकीलुर रहमानसँग सम्बन्धित मुद्दामा शरिफलाई बयान दिन अदालतमा उपस्थित हुन दिएको निर्देशन पालना नगरेको ब्यूरोले ठहर गरेको छ ।

शरिफ पञ्जाब प्रान्तका मुख्यमन्त्री हुँदा उक्त जग्गा सन् १९८६ मा अवैधानिक रुपमा लिजमा दिएको दाबी गरिएको छ ।

पाकिस्तानको मुश्लीम लिग–नवाजका ७० वर्षीय नेता शरिफ अहले उपचारका लागि अस्पतालमा छन् । रहमान भने प्रहरीको हिरासतमा छन् । पाकिस्तानका सञ्चारकर्मी, नागरिक समाज भने पक्राउको विरोध गर्दै आन्दोलनमा छन् । २७ मार्चमा एनएबीले शरिफलाई बयान दर्ता गर्न ३१ मार्चमा बोलाएको थियो । एजेन्सी