एजेन्सी। जापानले चीनमा हुने शीतकालीन ओलम्पिकमा कुनै आधिकारिक प्रतिनिधि नपठाउने भएको छ । जापानको यो निर्णयलाई अमेरिकाको निर्णयको समर्थन मानिएको छ ।

समाचार एजेन्सी रोयटर्सका अनुसार मुख्य क्याबिनेट सचिव हिरोकाजु मात्सुनोले फेब्रुअरीमा सुरु हुने खेलमा जापानले कुनै पनि सरकारी प्रतिनिधि नपठाउने बताए । बरु खेलकुदसँग प्रत्यक्ष सम्बन्ध राख्ने देशका पदाधिकारीलाई पठाइनेछ ।

टोकियो २०२० आयोजक समितिका प्रमुख र नेता सेको हाशिमोटो र घरेलु ओलम्पिक र पाराओलम्पिक समितिका प्रमुखहरू सामेल हुनेछन्।

चीनमा मानवअधिकार उल्लङ्घन भएको भन्दै अमेरिकाले फेब्रुअरीमा चीनको राजधानी बेइजिङमा आयोजना हुने शीतकालीन ओलम्पिकमा आफ्ना अधिकारी पठाउन अस्वीकार गरेको छ । तर, जापानले यस विषयमा नरम अडान लिएको छ ।

जापानको सरकारी सञ्चारमाध्यम एनएचकेका अनुसार प्रधानमन्त्री फुमियो किशिदालाई सत्तारुढ लिबरल डेमोक्र्याटिक पार्टीबाट चीनप्रति कडा अडान लिन निकै दबाब थियो। -बिबिसी हिन्दी