काठमाडौं । नेपाल क्रिकेट संघ (क्यान)को कारवाहीमा परेका चार जना क्रिकेटरले आफूहरुमाथि कारबाही गर्ने निर्णय पुनर्विचार गर्न आग्रह गरेका छन् ।

शुक्रबार संयुक्त पत्रकार सम्मेलन गर्दै क्रिकेटरहरु ज्ञानेन्द्र मल्ल, दीपेन्द्र सिंह ऐरी, सोमपाल कामी र कमल सिंह ऐरीले अभिभावकीय भूमिका खेल्न र निर्णयलाई पुनर्विचार गर्न आग्रह गरेका हुन् ।

‘हामी र हामी जस्ता क्रिकेट खेलमा भविश्य खोजिरहेका खेलाडीहरुले ब्याट र बल छाड्नुपर्ने दुर्भाग्यपूर्ण अवस्था नबनोस्,’ पत्रकार सम्मेलनमा उनीहरुले भने।

यसअघि गत बुधबार क्यानको बोर्ड बैठकले राष्ट्रिय टोलीका क्रिकेटरहरु ज्ञानेन्द्र मल्ल, दीपेन्द्र सिंह ऐरी, सोमपाल कामी र कमल सिंह ऐरीलाई पदमुक्त गरेको थियो ।

मल्लको पदमुक्तपछि क्यानले राष्ट्रिय क्रिकेट टोलीको कप्तानमा युवा लेग स्पिनर सन्दीप लामिछानेलाई नियुक्त गरेको थियो।

यसैबारे नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले क्रिकेट खेलाडीमाथि गरिएको कारवाहीमा असन्तुष्टि जनाएका छन् । शुक्रबार प्रधानमन्त्री शेरबहादुर देउवालाई बालुवाटारमा भेटेर अध्यक्ष प्रचण्डले क्यानले गरेको कारवाहीमा असहमति जनाउँदै यसबारे ध्यानाकर्षण गराएका थिए।