काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्ड र प्रधानमन्त्री तथा नवनिर्वाचित कांग्रेस सभापति शेरबहादुर देउवाबीच भेटवार्ता भएको छ।

स्रोतका अनुसार माओवादी अध्यक्ष प्रचण्ड शुक्रबार बिहान प्रधानमन्त्री देउवालाई भेट्न बालुवाटार पुगेका थिए ।

भेटमा अध्यक्ष प्रचण्डले सभापतिमा निर्वाचित भएकोमा देउवालाई बधाई तथा शुभकामना दिएको बालुवाटार स्रोतले जनाएको छ।

यस्तै, वर्तमान राजनीतिक परिस्थितिसहित गठबन्धनको आगामी रणनीतिबारे पनि उनीहरूबीच छलफल भएको स्रोतको भनाइ छ ।

यसैगरी स्रोतका अनुसार संसदमा देखिएको राजनीतिक गतिरोध अन्त्यका विषयमा पनि प्रधानमन्त्री देउवा र प्रचण्डबीच छलफल भएको बुझिएको छ।

प्रधानमन्त्री देउवा केही दिनअघि मात्रै कांग्रेस सभापतिमा बिजयी भएका थिए।