काठमाडौं । नेपाल प्रहरीले सामाजिक सञ्जालमार्फत महिलाको अश्लिल फोटो आफन्तलाई पठाई ब्ल्याकमेल गर्ने एक भारतीय नागरिकलाई पक्राउ गरेको छ ।

बैदेशिक रोजगारको क्रममा दुबईमा एउटै कम्पनीमा काम गर्ने भारतको उत्तर प्रदेशका ३१ वर्षीय मोहम सालिमले आफ्नै नेपाली महिला साथीलाई ब्ल्याकमेल गर्न थालेपछि उनी पक्राउ परेका हुन् ।

नग्न तस्बिरमा नेपाली युवती (सालिमका साथी) को अनुहारको भाग जोडी आफन्तलाई पठाई महिलालाई जबरजस्ती भेट्न धम्की दिने उनी कलंकीबाट आइतबार पक्राउ परेका हुन् ।

पटक–पटक महिलाको इच्छा विपरित ब्ल्याकमेल गरी भेट्ने प्रस्ताव गरिरहेका सालिमलाई महिलाकै सहयोगमा प्रहरीले पक्राउ गरेको हो ।

भारत उत्तर प्रदेश माऊ जिल्ला कोपागंज दोस्तपुरा घर भएका सालिम र नेपाली महिला दुवईको एउटै कम्पनीमा काम गर्थे ।

नेपाल फर्किएपछि सालिमसँग टाढा हुन खोजेकी उनलाई सालिमले पटक–पटक आफूलाई नभेटेमा ‘दुवईमा हुँदा सेक्स गरेको भिडियो छ, सार्वजनिक गरिदिन्छु’ भन्दै ब्ल्याकमेल गर्दै आएको प्रहरी अनुसन्धानमा खुलेको छ ।

हुन्छ भेट्छु भन्दै नेपाल बोलाएकी उनले अन्ततः प्रहरीको सहयोगमा सालिमलाई पक्राउ गराएकी हुन् । सालिमलाई प्रहरीले होटलबाट पक्राउ परेको हो ।

अहिले उनीविरुद्ध विद्युतीय अपराध ऐन, २०६३ अनुसार ५ दिन म्याद थप गरेर काठमाडौं प्रहरीले विस्तृत अनुसन्धान गरिरहेको जनाएको छ ।