महोत्तरी । नेपाली कांग्रेस महोत्तरी-३ को अधिवेशनमा संस्थापन इतरका विमलेन्द्र निधि र रामचन्द्र पौडेल प्यानलबीच झडप भएकाे छ । जारी क्षेत्रीय अधिवेशनको बन्दसत्रमा दुई पक्षबीच झडप भएको हाे ।

बन्दसत्रमा सहभागीहरूले बताएअनुसार निधि र पौडेल प्यानलबीच भएको विवाद र अडानले झडप भएको हो । झडपमा निधि पक्षका नेता रामु यादव सामान्य घाइते भएका छन् ।

महाेत्तरी-३ बाट मनोज झा, रामु यादव र रागवेन्द्र झा सभापतिको आकांक्षी छन् । मनोज झा र रामु यादव निधिनिकट मानिन्छन् भने रागवेन्द्र रामचन्द्र पौडेल निकट हुन् ।

यता, निधि निकट नेताहरूले भने कांग्रेसका पूर्व केन्द्रीय सदस्य रामचन्द्र तिवारीको कारण झडप भएको आराेप लगाएका छन् ।

तिवारीले चुनावभन्दा पनि रागवेन्द्र झालाई सर्वसम्मत सभापति बनाउनु पर्ने अडान गरेकाे तर विमलेन्द्रनिकट नेताहरूले अस्वीकार गरेपछि तिवारी पक्षले टोले गुण्डा परिचालन गरेको आरोप छ ।