काठमाडौँ । महानगरीय अपराध महाशाखाले काठमाडौंको बूढानीलकण्ठबाट ४४ लिटर रक्त चन्दनको तेलसहित २ जनालाई पक्राउ गरेको छ ।

पक्राउ पर्नेहरूमा रामेछाप उमाकुण्ड-४ घर भई हाल काठमाडौँ बालाजु बस्ने २७ बर्षीय रामबहादुर खत्री र कास्की लेखनाथ महानगरपालिका-१० घर भइ हाल काठमाडौँकै बूढानीलकण्ठ बस्ने ४० बर्षीय गंगाबहादुर पुन रहेका छन्।

महाशाखाका एसपी कृष्णप्रसाद कोइरालाका अनुसार बुधबार ४४ लिटर रक्त चन्दनको तेलसहित उनीहरुलाई पक्राउ गरिएको हो।

बुढानिलकण्ठ-५ पञ्चकुमारी मन्दिर नजिकबाट ४४ लिटर रक्त चन्दनको तेल प्रति लिटर रु ५ लाखका दरले अबैध कारोबार भई राखेको छ भन्ने गोप्य सूचनाको आधारमा खटिएको प्रहरी टोलीले उक्त स्थानबाट उनीहरुलाई पक्राउ गरेको एसपी कोइरालाको भनाइ छ।

उनीहरुका अनुसार उक्त तेल नेपालगंजबाट ल्याएको र भारतबाट नेपाल हुदैँ चिनतर्फ तस्करी गर्ने गरेको प्रहरीको अनुसन्धानमा खुल्न आएको एसपी कोइरालाले बताए।

उनीहरूलाई आवश्यक कारवाहीको लागि वन डिभिजन कार्यालय, हात्तीसार  पठाइएको महाशाले जनाएको छ।