काठमाडौँ । महानगरीय अपराध महाशाखाले नक्कली ‘युरेनियम’ देखाएर ठग्न खोजेको आरोपमा ३ जना युवकलाई पक्राउ गरेको छ ।

पक्राउ पर्नेमा नुवाकोटको विदुर नगरपालिका–६ घर भएका ३१ वर्षीय प्रदिप घिमिरे, राजेन्द्र परियार र काठमाडौंको तारकेश्वर नगरपालिका स्थित फुटुङ घर भएका २६ वर्षीय रञ्जित कार्की छन् ।

महाशाखाका एसपी कृष्ण पंगेनीका अनुसार पक्राउ परेका युवकहरुले १२ सय ग्रामको दुईवटा ढुंगाजस्तो देखिने वस्तु देखाएर करोडौं ठग्न खोजेका थिए।उनीहरुको साथबाट कालो र सेतो मिसिएको १२ सय ग्रामको नक्कली युरेनियम (ढुंगा) बरामद गरिएको एसपी पंगेनीले जानकारी दिए ।

उनका अनुसार आरोपीहरुले युरेनियम भनेर सो ढुंगालाई २ करोडमा बेच्न लागेको गोप्य सूचनाको आधारमा खटिएको प्रहरीको टोलीले उनीहरुलाई बालाजुबाट पक्राउ गरेको हो।

यस बिषयमा महाशाखाले थप अनुसन्धान गरिरहेको एसपी पंगेनीले बताए ।