काठमाडौं । आफूलाई सभ्रान्त परिवारको सदस्य बताउने चार जना व्यक्तिले १४ वर्षदेखि करौडौं नतिरी नृपशमशेर राणाको परिवारलाई नै घर न घाटको बनाएको रहस्य खुलेको छ । 

८५ वर्षको नृपशमशेर राणालाई छलकपट गरी जग्गा पास गरेर १४ वर्षदेखि उल्टै मुद्दा मामिलामा फसाई दुःख दिनेहरुमा अमर केशर सिंह, सुभासनम शाह, नविन राउत र अमरशमशेर राणा छन् । 

उनीहरु चारैजनाविरुद्ध पक्राउ पुर्जी जारी भएको दुई महिना पुगिसकेको छ । आफूलाई धनाढ्य बताउँदै आउने उक्त समूहले छलकपट गरी २०६८ असार २२ गते साढे ६ करोडमा जग्गा खरिद गरेका थिए । 

महावीर विल्डर्स प्रालि नामको कम्पनी खोलेर उनीहरू ४ जनाले थापाथलीमा रहेको नृपशमशेर जबराको २७ आना ६ करोडमा खरिद गरेका थिए । २०६८ असारमा जग्गा खरिद गर्दा उनीहरुले पाँच करोडको दुईवटा चेक दिएको र सो चेक नसाटिएपछि जग्गाधनीले अदालतमा चेक अनादरको मुद्दा दायर गरेका थिए ।

काठमाडौं जिल्ला अदालतले २०७१ वैशाख ९ मा बिगो भराउने फैसला गरेको थियो । तर, बिगो रकम दाखिला नगरेपछि बादीको निवेदनको आधारमा २०८२ माघ २३ मा अदालतले पुनः उनीहरू विरुद्ध पक्राउ पुर्जी जारी गरेको थियो । अदालतले बिगो बापत प्रतिवादीहरूलाई २ वर्ष कैदमा राख्न आदेश गरेको छ ।

जग्गा विक्री गर्दा नृपशमशेर ८५ वर्षका थिए । कानून अनुसार ८० वर्ष भन्दा माथिका व्यक्तिले अचल सम्पत्ति खरिद बिक्री गर्दा संरक्षक चाहिले प्रवन्ध छल्न उनीहरुले नृपशमशेरलाई झुलाएर एक नक्कली संरक्षक खडा गरी जग्गा पास गराएका थिए । 

नृपशमशेरका नाती दीपालका अनुसार काम गर्ने व्यक्तिलाई संरक्षक बनाई वडा सचिवलाई सिफारिस गर्न लगाएर अमरकेशर सिंह र उनको समूहले जग्गा हत्याएको हो । 

उनीहरूले महाविर विल्डर्स प्रालिको चेककको भरमा थापाथली जस्तो काठमाडौंको मुटुमा रहेको जग्गा हत्याएका थिए ।

फरार रहेका अमरशमशेर राणा भने नेपालकै पहिलो गभर्नर हिमालय शमशेर राणाका छोरा तथा हिमालयन बैंकका सीइओ अशोक राणाका भाइ हुन् । अमरशमशेरलाई सीइओ राणाले नै जोगाउँदै आएको पीडित पक्षको दावी छ । 

चार जनामध्ये नविन राउत गत फागुन ७ गते पक्राउ परि पुर्पक्षका लागि सुन्धारास्थित सेन्टर जेल चलान भएका छन् । 

सिंहलाई भने अपराध महाशाखाले पक्राउ गरेको छ । गत चैत २८ गते चित्लाङबाट पक्राउ परेका सिंह विरामी भएको वहानामा गंगालाल अस्पतालको सीसीयूमा भर्ना भएका छन् । पूर्वराजा ज्ञानेन्द्र शाहले मानार्थ जनरलको उपाधि दिएका दिवंगत भरतकेशर सिंहका पुत्र हुन्–अमर केशर सिंह । 

पक्राउ परेकै दिन सिंहलाई त्रिपुरेश्वरस्थित ब्लुक्रस अस्पताल पुर्याइएको थियो । अस्पतालले सिंहले मादक पदार्थ सेवन नगरेको, उनको शरिरमा कुनै चोटपटक नभएको र शरिरको भित्री भागमा पनि कुनै समस्या नभएको भन्दै प्रहरीलाई पत्र दिएको छ । 

तर, छात्ति दुख्यो, धेरै गाह्रो भयो भन्दै गंगालाल अस्पताल पुगेका सिंहलाई त्यहाँका चिकित्सक डा. सुशान्त घिमिरेले सीसीयूमा भर्ना गरिदिए । सिहं र घिमिरेको यो चलाखी बुझिनसक्नु भएको पीडितले बताएका छन् । 

महाविर विल्डर्समा यी चारै जनाको बराबर सेयर रहेको छ । सिंह भने उक्त कम्पनीको अध्यक्ष छन् । महाविरले नृपशमशेर जवरासँग २०६८ साल असार २२ गते थापाथलिमा रहेको १ रोपनी १० आन ३ पैसा ३ दाम जग्गा ६ करोड ५० लाखमा खरिद गरेको थियो । 

उनीहरुले १ करोड ५० लाख नगद दिएर बाँकी रकम ५ करोडको भने महाविरकै दुईवटा चेक दिएका थिए । जग्गा विक्री गर्ने नृपशमशेरको देहावसन भइसकेको छ । उनका छोरा दिपक र नाति दीपाल १४ वर्षदेखि उक्त रकमको लागि अदालनको ढोका ढकढक्याइरहेका छन् । 

महाविर विल्डर्सले नृपशम्शेरलाई दिएको २ बटा चेक भुक्तानी नभएपछि काठमाडौं जिल्ला अदालतमा २०६९ चैत्र १६ गते मुद्दा नं ३९–०६९–०३९२९ र मिति २०६९ चैत्र ३१ गते मुद्दा नं ३९–०६९–०३९३० दर्ता भएको थियो । 

उक्त मुद्दामा काठमाडौं जिल्ला अदालतबाट मिति २०७१ वैशाख ९ गते वादी दावी पुग्ने फैसला भएको थियो । जिल्ला अदालत काठमाडौंले चेक अनार मुद्दामा महाविरका विल्डर्सका सञ्चालकहरुमाथि पक्राउ पुर्जी जारी गर्दै उनीहरुरलाई दुई/दुई वर्ष थुनामा पठाउने फैसला गरेको छ । सँगसँगै पीडितलाई रकम भराउन पनि आदेश गरिसकेको छ । 

जिल्ला अदालतको उक्त फैसलालाई उच्च अदालत पाटनले पनि २०७२ चैत १२ गते सदर गरेको थियो । 

सर्वोच्च अदालतले पनि जिल्ला र उच्चकै फैसलालाई सदर गर्दै यी चारैजनाबाट १० करोड असुल उपर गर्नु भन्ने आदेश गरेको छ । 

सर्वोच्च अदालतले दीपकशमशेर राणा र उनका छोरा दीपाललाई १० करोड दिनुपर्ने फैसला गरेको छ । २०८० चैत १८ गते सर्वोच्चले यी चारै जनालाई १० प्रतिशत ब्याजसहित १० करोड भराउने फैसला गरेको हो । र, पनि उनीहरुले अझै रकम नदिई उल्टै पीडितलाई नै धम्क्याउँदै आइरहेका छन् ।  

नृमशमशेरले बेचेको थापाथलीको जग्गाको मूल्य अहिले ३० करोड भन्दा बढी पर्छ । तर, अहिलेसम्म उनका परिवारले न पैसा पाए न त जग्गा नै फिर्ता । 

अझ रोचक पक्ष त के छ भने २०६८ असार २२ गते खरिद गरेको जग्गा महाविर विल्डर्सले त्यसको भोलिपल्टै अर्थात २०६८ असार २३ गते नै दिपेन्द्र ठकुरीलाई पास गरिदिएको थियो । 

सम्बन्ध राम्रो भएका कारण चेकको भरमा जग्गा राजीनामा पास गरेर दिएका नृपशमशेरका छोरा दीपकको परिवार यतिबेला घर न घाटको बनेको छ । तीनै तहका अदालतबाट आफ्नो पक्षमा फैसला आउँदा पनि रकम नपाएकोप्रति उनी दुःखी छन् ।

नृपशमशेरका नाती दीपाल भन्छन्–‘कस्तो अचम्म, तीन वटै अदालतले हाम्रो पक्षमा फैसला गरेको छ । अझै दुइ जना पक्राउ पर्न बाँकी नै छन् । तर, पक्राउ परेकालाई डाक्टर जस्तो व्यक्तिले जालसाँझी गरी अस्पतालमा भर्ना गराएर राखेका छन् । जेनजी आन्दोलनपछि न्याय पाउने आश गरेका थियौं । तर, मिलेमतोमै पीडितलाई झन पिडा दिने काम अझै रोकिएको रहेनछ ।’

हिमालयन बैंकका सीइओ राणासँग उनको भाइ अमरशमशेर राणाको बारेमा प्रतिक्रियाका लागि सम्पर्क गर्न खोज्दा उनीसँग सम्पर्क हुन सकेन ।