बनेपा । काभ्रेको बनेपा नगरपालिकाकी उपप्रमुख विमला सापकोटासहित उनका तीन दिदीबहिनी सामाजिक बहिष्कारको सामना गर्दै बाबुको काजक्रियामा बसेका छन् ।

विमलासहित उनका दुई बहिनीहरू निर्मला र राधिका दिवंगत बुवा हरिप्रसाद सापकोटालाई दाहसंस्कार गरेर काजक्रियामा बसेका हुन् ।

बुवाको ९१ वर्षको उमेरमा आइतबार निधन भएपछि छोरा नभएका सापकोटालाई दागबत्ती कसले देला र काजक्रिया कसले गर्छ भन्ने चर्चा नै चलेको थियो ।

तर, उपप्रमुख विमला सापकोटाले दागबत्ती आफै दिने र काजक्रिया पनि दिदीबहिनीले नै गर्ने बताएपछि गाउँलेहरु विभाजित बनेको आफन्तहरु बताउँछन् । विमलासहितका तीन दिदीबहिनी जब काजक्रिया गर्न अग्रसर भए तब समाजले त्यसलाई स्वीकार्न चाहेन । तर, उनीहरु पछि हटेनन् ।

समाजको बहिष्कारको चेतावनीका बाबजुद उनीहरु बाबुको किरियामा बसेका छन् । आफूहरू किरियामा बस्दै गर्दा बहिष्कार गर्ने मिटिङ बसिरहेको थाहा पाएको भन्दै बिमलाले सामाजिक सञ्जालबाटै आक्रोशसमेत व्यक्त गरेकी छन् ।

उनले सामाजिक सञ्जाल फेसबुकमा लेखेकी छन्–‘महिला माथिको बिभेद कहिले अन्त्य हुन्छ आफ्नु बाउको काजक्रिया गर्दा सामाजिक बहिष्कारको मिटिङ हुँदैछ । यो समाज र दाजुभाइ भन्नेहरुले हामीलाई पीडा माथि पीडा थप्ने बहस र बैठक तुरुन्त रोक्न अनुरोध छ । हामीले अरु कसैको वंशमा दखल गरेका छैनौ हामी अब थप पीडा सहन सक्ने अवस्था मा छैनौ ।’

उनले आफूहरू बहिष्कार हुन तयार रहेको भन्दै कानून र संविधानविपरीत काम नगर्न चेतावनीसमेत दिएकी छन् । आफूहरूले गरेको यो कार्यले हजारौं छोरीहरुमाथि न्याय हुने बिमलाले उल्लेख गरेकी छन् ।

यस्तो छ उनको दुईवटा फेसबुक स्टाटस
महिला माथिको बिभेद कहिले अन्त्य हुन्छ ?आफ्नु बाउको काजकृया गर्दा सामाजिक बहिष्कारको मिटिङ हुँदैछ । यो समाज र दाजुभाइ भन्नेहरुले हामीलाई पिडा माथि पिडा थप्ने बहस र बैठक तुरुन्त रोक्न अनुरोध छ ।हामीले अरु कसैको बंशमा दखल गरेका छैनौं हामी अब थप पिडा सहन सक्ने अवस्था मा छैनौं ।

ख्याल गर तिमीहरूले चलाएको बहस कानुन र सबिधानको पनि बर्खिलाब छ ।हामीले गरेको यो कामले हजारौं छोरि माथि न्याय हुनेछ । खबरदार यो छ्लफल र बहस रोकि हाल हामि बहिसकार हुन तयार छौ । १३ दिन हाम्रो बुवाको घरमा बसेर काजक्रिया गर्न देउ पिडा नदेउ १३ दिन पछि सदाको लागि माइतीको ढोका बन्द गरेर कर्म घर फर्कने छौं । समाजको डर लाग्ने हरु कृपया हामिलाइ साथ दिनु पर्ने बाध्यता नसमझनु होला तपाईं स्वतन्त्र हुनुहुन्छ ।