अनलाइन नेपाल
बुटवल । प्रहरीको फरार सूचीमा रहेका लुम्बिनी प्रदेशसभा सदस्य विष्णुप्रसाद पन्थी प्रधानमन्त्री केपी शर्मा ओली सहभागी कार्यक्रममा देखिएका छन् ।
मोरङ जिल्ला अदालतले २०८१ जेठ ३२ गते पन्थीलाई पक्राउ गर्न आदेश जारी गरेको थियो । त्यसयता उनी प्रहरीको फरार सूचीमा रहेका छन् ।
तर उनी सोमबार बुटवलमा आयोजित बुद्ध जयन्ती कार्यक्रममा प्रधानमन्त्री ओलीसँगै देखिएका हुन् । पक्राउ आदेश जारी भएपनि पन्थी यसअघि पनि निर्वाधरूपमा प्रदेशसभा बैठकमा सहभागी हुँदै आएका छन् ।
पन्थी सञ्चालक रहेको गौतमबुद्ध हाइड्रो पावर प्रालिले विराटनगरस्थित पल्लवी इलेक्ट्रा प्रालिबाट उधारोमा लिएको विद्युतीय सामग्रीको रकम तिर्न बाँकी रहेपछि अदालतले उनी र साझेदार देवराज खनालविरुद्ध पक्राउ पूर्जी जारी गरेको थियो ।
अदालतको आदेशअनुसार असार १२ गते काठमाडौं प्रहरीले पन्थीलाई पक्राउ गरी उपस्थित गराउन भनिएको थियो। तर, उनी सार्वजनिक रूपमा देखिँदा पनि प्रहरीले नियन्त्रणमा लिएको छैन।
पन्थी कपिलवस्तुको वाणगंगा नगरपालिका निवासी हुन् र प्रदेशसभा निर्वाचन क्षेत्र १९ (क) बाट एमाले तर्फ निर्वाचित सांसद हुन् ।
अदालतले ०७७ मंसिर २३ गते पन्थीले तिर्न बाँकी रकम भुक्तानी गर्न आदेश दिएको भए पनि निर्णय कार्यान्वयन नभएपछि ६ महिनाको कैदसहित पक्राउ आदेश जारी गरेको थियो ।
हिमचुली मिडिया प्रा. लि.
इमेल: [email protected]
फोन नम्बर: +977- 01-4526373 (9851137729, 9851148387)
ठेगाना: न्यू प्लाजा, पुतलीसडक, काठमाडौं
दर्ता नम्बर: 1695/076/077
Leave a Reply