अनलाइन नेपाल
मोरङ । विराटनगरको रत्ना होटलको सम्राट क्यासिनोमा ‘ग्याङ फाइट’ भएको छ ।
आइतबार राति करिब १२ बजे क्यासिनो परिसरमा एमाले नेता किरण लामा र रोनाल कँडेलको समूहसँग कांग्रेस निकट अभिषेक गिरीसहितको समूहको ग्याङ फाइट भएको हो ।
क्यासिनोमा प्रवेश गर्न खोजेका लामा र कँडेलसँगको विवादपछि दुई समूहबीच कुटाकुट भएको प्रहरी स्रोत बताउँछ । आइतबार राति अभिषेक गिरी रत्ना होटलको क्यासिनोमा रहेका थिए । सोही बेला कँडेल र लामा क्यासिनोमा पुगेका थिए ।
उनीहरुलाई क्यासिनोमा प्रवेश गर्न बाउन्सरले रोके । त्यसपछि विवाद उत्पन्न हुँदा कुटाकुट भएको बताइएको छ ।
क्यासिनोमा नेपाली नागरिकलाई प्रवेश निषेध छ। तर, क्यासिनो प्रवेश गरेको समूहबीच विवाद हुँदा कुटाकुट भएको घटना बाहिरिएको हो ।
यता जिल्ला प्रहरी कार्यालय मोरङले दुवै समूह फरार रहेको जनाएको छ । उनीहरु प्रहरी घटनास्थल पुग्दासम्म भागिसकेको बताइएको छ ।
आफूमाथि कुटपिट भएको भन्दै अभिषेक समूहका निकेश गिरीले रोनाल कँडेल र किरण लामाविरुद्ध जाहेरी दिएको मोरङ प्रहरीका प्रवक्ता डीएसपी वेदप्रकाश जोशीले जानकारी दिए ।
जाहेरी परेपछि प्रहरीले घटनामा संलग्नको खोजी तथा अनुसन्धान थालेको हो । उनीहरु सबै गुण्डागर्दीमा संलग्न भएको प्रहरीको रेकर्डमा छ ।
हिमचुली मिडिया प्रा. लि.
इमेल: mail.onlinenepal@gmail.com
फोन नम्बर: +977- 01-4526373 (9851137729, 9851148387)
ठेगाना: न्यू प्लाजा, पुतलीसडक, काठमाडौं
दर्ता नम्बर: 1695/076/077
Leave a Reply