उमागौरी कृषि सहकारीका अध्यक्ष रौनियार पुर्पक्षका लागि जेल चलान

अनलाइन नेपाल

आइतबार, २० माघ २०८१

300

विराटनगर । उमागौरी कृषि सहकारी संस्थाका अध्यक्ष शम्भु रौनियार पुर्पक्षको लागि कारागार चलान भएका छन् ।

सहकारीको रकम हिनामिनाको आरोपमा रौनियारलाई पुर्पक्षका लागि थुनामा पठाउन जिल्ला अदालत मोरङले आदेश दिएको हो ।

न्यायाधीश अरुणकुमार झाको इजलासले रौनियारलाई थुनामा राखेर मुद्दाको पुर्पक्ष गर्न आदेश दिएका हुन् । आदेशलगत्तै रौनियारलाई कारागार चलान गरिएको छ।

तत्काल प्राप्त प्रमाणका आधारमा पछि ठहरेबमोजिम हुने गरी रौनियारलाई कारागार चलानको आदेश भएको हो ।

बचतकर्ताले जम्मा गरेको रकम अपचलनमा मुछिएपछि सहकारीको कार्यालय बन्द गरेर फरार भए उनी यही माघ १४ गते अदालतमा हाजिर भएका थिए।

अदालतमा उनको बयान लिन नै ३ दिन समय लागेको थियो। बीचमा शनिबारसहित ३ दिन बिदा पर्‍यो। रौनियारको बयान गत शुक्रबार सकिएको हो। अदालत हाजिर भएयता उनी जिल्ला प्रहरी कार्यालय मोरङको हिरासतमा थिए।

रौनियारसहित २६ जनालाई प्रतिवादी बनाएर सहकारीको रकम अपचलन मुद्दा मंसिर २७ गते अदालतमा दर्ता भएको थियो।

मुद्दामा सहकारीका अध्यक्ष रौनियारसहित संघीय संसदको सार्वजनिक लेखा समितिका सभापति ऋषिकेश पोखरेलकी पत्नी अन्जला कोइराला, रंगेली नगरपालिका–२ का वडाध्यक्ष सन्तलाल खवास, धनपालथान गाउँपालिका–४ का पूर्ववडाध्यक्ष रोशन चौधरीलगायत प्रतिवादी छन्।

हिनामिना भएको २२ करोड ४८ लाख २७ हजार ७ सय रुपैयाँ बिगो मागदाबीसहित मुद्दा दर्ता गरिएको थियो। मुद्दाको अनुसन्धानका क्रममा पूर्ववडाध्यक्ष चौधरी मात्रै पक्राउ परेका थिए। उनलाई अदालतले पुर्पक्षका लागि थुनामा राख्न आदेश दिएको थियो।

सहकारी ठगी