काठमाडौं । राष्ट्रिय स्वतन्त्र पार्टीका सभापति रवि लामिछानेलाई कास्की प्रहरीले कार्यवाहक सभापति डिपी अर्यालको जिम्मा लगाएको छ ।

शुक्रबार बिहान १० बजे काठमाडौं प्रहरी परिसरमा उपस्थित हुने सर्तमा कास्की प्रहरीले लामिछानेलाई अर्यालको रोहबरमा छाडेको हो ।

उनको पोखरास्थित गण्डकी अस्पतालमा स्वास्थ्य परीक्षण गराएर परिवारको जिम्मा लगाइएको प्रहरीले जनाएको छ ।

कास्कीस्थित सूर्य दर्शन सहकारीको रकम हिनामिना आरोपमा लामिछाने २ कार्तिकमा काठमाडौ‌बाट प्रकाउ परेका थिए । उनलाई आजै कास्की जिल्ला अदालतले ६५ लाख रुपैयाँ धरौटीमा रिहा गर्न आदेश दिएको थियो ।

बिहीबार कास्की जिल्ला अदालतले सात जना प्रतिवादीसँग धरौटी माग गरेको थियो। पूर्वडिआइजी छविलाल जोशीलाई पनि ८८ लाख रूपैयाँ धरौटी माग गरिएको थियो।