काठमाडौं । चिनियाँ नयाँ वर्ष (लुनार न्यु इयर)को अवसरमा हङकङमा क्रियाशील नेपालीको संस्था लालीगुराँस एसोसिएसनले ‘एलजी फेस्ट २०२५’ को आयोजना गर्ने भएको छ ।

जनवरी ३० मा ताइ तोङ अर्गानिक इको पार्कमा हुने उक्त कार्यक्रम भव्य रूपमा सम्पन्न गर्ने तयारीमा आयोजक संस्था जुटेको छ ।

लालीगुराँस एसोसिएसनले हरेक चिनियाँ नयाँ वर्षको अवसर पारेर हङकङमा ‘एलजी नाइट (लालीगुराँस नाइट) आयोजना गर्दै आइरहेकोमा यस पटक भने एसोसिएसनले खुल्ला स्थानमा ‘एलजी फेस्ट २०२५’ को आयोजना गर्न लागेको हो ।

हङकङको इतिहासमै पहिलो पटक खुल्ला ठाउँमा ‘एलजी फेस्ट २०२५’(एलजी नाइट १७) आयोजना हुन गइरहेको आयोजक मध्येका चेतन गुरुङले बताए ।

उनले कार्यक्रमका लागि स्टेज, साउण्ड, भेन्यु र लाइटमा मात्रै करिव एक मिलियन हङकङ डलर खर्च हुने जानकारी दिए । हङकङ सरकारको मापदण्ड र स्ट्याण्डर्ड अनुसार नै स्टेज तयार हुने आयोजक संस्थाले जनाएको छ । कार्यक्रममा नेपाली खानाहरुको स्टल पनि रहने छ ।

चेतन गुरुङ, विशाल गुरुङ, हिमाल रानालगायत हङकङका जुझारु नेपाली युवाले सन् २००४ मा हङकङमा ‘लालीगुराँस एसोसिएसन’ नामक संस्थाको स्थापना गरेका थिए । उनीहरुले नै एलजी नाइटको आयोजना गर्दै आएका छन् ।

आयोजकमध्येका चेतन गुरुङले यो वर्ष पनि कार्यक्रम भव्य र सब्य हुने बताएका छन् । चिनियाँ नयाँ वर्षमा हुने लामो बिदामा चिनियाँहरू आफ्नो संस्कृतिमा रमाइरहँदा नेपालीले पनि आफ्नै संस्कृतिमा रमेर बिदा मनाऊन् भन्ने उद्देश्यले कार्यक्रम आयोजना गर्न लागिएको उनको भनाई छ । संस्थाले यसअघि सन् २०२४ मा १६औँ एलजी नाइट सम्पन्न गरेको थियो ।

कार्यक्रममा नेपाली ब्याण्ड जोन एण्ड द लोकल्स, कन्दरा, पूर्ण राई एण्ड द दाजुभाई र शान्ति श्री परियार (रुकुमकोट) लगायतले आफ्नो कला प्रस्तुती देखाएर दर्शकहरुलाई मनोञ्जन प्रदान गर्नेछन् भने भारतको टेलिभिजन रियालिटी शो ‘इन्डियाज् बेस्ट डान्सर’ सिजन ३ का विजेता समर्पण लामाले पनि नृत्य प्रस्तुत गर्नेछन् ।

त्यस्तै डान्सर सुस्मिता तामाङले पनि कार्यक्रममा आफ्नो प्रस्तुती दिंदैछिन् । कार्यक्रमको होस्ट भने कलाकार जीतु नेपाल र नायिका केकी अधिकारीले गर्ने भएका छन् । अधिकारीले पनि कार्यक्रममा आफ्नो प्रस्तुति दिएर दर्शकहरुलाई थप मनोरञ्जन प्रदान गर्ने बताइएको छ ।

कार्यक्रममा हङकङको स्थानिय ब्याण्ड र स्थानीय कलाकारहरुले पनि प्रस्तुती दिएर नेपाली कलाकारहरुलाई सघाउने छन् ।

स्थापनाकालदेखि हरेक वर्ष कार्यक्रम गर्दै आएको लालीगुराँस एसोसिएसनको ‘एलजी नाइट’ पछिल्लो समय अस्ट्रेलिया, यूके, मकाउ, जापानलगायतका देशमा पनि गर्दै आएको छ । यो वर्ष भने अमेरिकामा जनवरी ९ मा ‘एलजी नाइट यूएसए’ हुँदैछ ।

कार्यक्रमबाट भएको अर्थोपार्जन नेपालका परोपकारी संस्थामार्फत विभिन्न क्षेत्रमा सहयोग गर्ने गुरुङले बताए ।

एलजी एसोसिएसनले २०७२ सालको भूकम्पको बेला गोरखा, धादिङ तथा सिन्धुपाल्चोकमा राहत वितरण गरेको थियो । त्यस्तै, पोखरा तथा दमौलीमा उपचाररत भूकम्पपीडित घाइतेलाई औषधोपचारको व्यवस्था गरेको थियो ।