काठमाडौं । नेकपा (माओवादी केन्द्र) ले संविधान संशोधनका लागि चारवटा विकल्पमा केन्द्रीय समिति बैठकमा छलफल गर्ने भएको छ ।

शुक्रबार बसेको स्थायी समिति बैठकले संविधान संशोधनका लागि प्रत्यक्ष निर्वाचित कार्यकारी राष्ट्रपति, पूर्ण समानुपातिक निर्वाचन प्रणाली, सांसद मन्त्री बन्न नपाइने र प्रतिनिधि सभामा ५० प्रतिशत महिला सहभागिता सुनिश्चित हुनुपर्ने विकल्पहरू अघि सारेको छ ।

सोही विकल्पहरूमा आइतबारबाट सुरु हुने केन्द्रीय समिति बैठकमा छलफल हुने भएको हो ।

ती विकल्पबारे शुक्रबारको स्थायी समिति बैठकमा छलफल भएको र केन्द्रीय समिति बैठकमा पनि छलफल हुने प्रवक्ता अग्निप्रसाद सापकोटाले बताए ।

अब सो विकल्पहरूबारे केन्द्रीय समितिले निर्णय गर्नेछ । सत्तारुढ दलहरुले संविधान संशोधनको तयारी गरिरहेका छन् ।