दाङ । नेकपा एमालेका महासचिव शंकर पोखरेलले जनताको अपेक्षाअनुसार वर्तमान सरकारले काम गर्नुपर्ने बताएका छन् ।

एमाले दाङ प्रचार तथा प्रकाशन विभागले आयोजना गरेको कार्यक्रमा बोल्दै महासचिव पोखरेलले यस्तो बताएका हुन् ।

महासचिव पोखरेलले ठूला राजनीतिक दललाई असफल हुने छुट नभएको बताए। विगतमा सरकारमाथि अदालतको हस्तक्षेप, अराजकता र अस्थिरताका कारण देशको अर्थतन्त्र समेत कमजोर हुन पुगेको उनले बताए ।

अहिले देशको आर्थिक अवस्थामा सुधार आइरहेको दाबी उनले गरे। राम्रो काम गर्दा गर्दै सरकार ढल्दैछ भनेर हल्ला चलाउने काम भइरहेको महासचिव पोखरेलको आरोप छ ।

पोखरेलले देशका ठूला राजनीतिक दल मिलेर बनेको सरकार कसैले चाहेर पनि नढल्ने बताए। उनले ठूला दलहरू मिलेर बनेको वर्तमान सरकारले योजनाबद्ध सुधारका काम गरिरहेको बताए ।

कसैलाई चित्त नबुझ्दैमा सरकार ढल्न नसक्ने दाबी उनले गरे । ठूला दल मिलेको चित्त नबुझे पनि मिलिराखेपछि सबैलाई स्विकार्न बाध्यता हुने विचार उनले व्यक्त गरे ।