कञ्चनपुर । कञ्चनपुरमा आफैंमाथि गोली चलाएका प्रहरी जवान चक्रप्रसाद न्यौपानेको उपचार कोहलपुर मेडिकल कलेजमा भइरहेको छ ।

शुक्रबार साँझ करीब ६ बजेको समयमा जिल्ला प्रहरी कार्यालयको प्रबन्ध शाखामा उनले आफैंमाथि गोली प्रहार गरेका थिए । गोली उनको टाउकोमा लागेको छ ।

उपचारका लागि तत्कालै धनगढीको नवजीवन अस्पताल पुगाइएका न्यौपानेलाई थप उपचारका लागि कोहलपुर मेडिकल कलेज लगिएको हो । उनको स्वास्थ्य अवस्था स्थिर रहेको प्रहरीले जनाएको छ ।

प्रहरी स्रोतका अनुसार न्यौपाने बोल्न थालेका छन् । अछाम स्थायी घर भएका न्यौपानेले प्रबन्ध शाखामा कोही नभएका बेला आफैंमाथि गोली चलाएको बुझिएको छ । प्रहरीले घटनाको अनुसन्धान थालेको छ ।