काठमाडौं । नेकपा (माओवादी केन्द्र) ले संघीय निजामती सेवासम्बन्धी विधेयकलाई अघि बढाउन सरकारले ढिला गर्न खोजेको आरोप लगाएको छ ।

सिंहदरबारमा शुक्रबार बसेका प्रतिनिधिसभा अन्तर्गतको राज्य व्यवस्था तथा सुशासन समिति बैठकमा माओवादी प्रमुख सचेतक हितराज पाण्डेले यस्तो आरोप लगाएका हुन् ।

शुक्रबार संघीय निजामती सेवाको गठन, सञ्‍चालन र सेवाका सर्त सम्बन्धमा व्यवस्था गर्न बनेको विधेयक उपर संशोधनकर्तासँगको छलफल भएको थियो ।

सोही क्रममा पाण्डेले विधेयकको छलफलका क्रममा सामान्य प्रशासन मन्त्री उपस्थित नहुनुले सरकारले नै उक्त विधेयकलाई ढिला गर्न खोजेको महसुस भएको बताए ।

उनले संघीय निजामती सेवासम्बन्धी विधेयक अघि नबढ्दा प्रदेश र स्थानीय सरकारले सहज ढंगले काम गर्न नसकेकाले गम्भीर हुन आग्रह गरे ।