काठमाडौं । भक्तपुरको बालकोटमा मृत भेटिएका बाबु–छोराको हत्या प्रकरणमा प्रहरीले एक जनालाई नियन्त्रणमा लिएको छ ।

सूर्यविनायक नगरपालिका २ बालकोटस्थित डेरामा कुलप्रसाद आचार्य र उनका कान्छा छोरा २२ वर्षका प्रवीण आचार्यको हत्याबारे अनुसन्धानका लागि प्रहरीले कुलप्रसादकै जेठा छोरा मिलन आचार्यलाई पक्राउ गरेको हो ।

उनलाई महाराजगञ्जबाट पक्राउ गरिएको प्रहरी स्रोतले बतायो । उनले हत्यामा आफ्नो संलग्नता समेत स्वीकार गरिसकेको प्रहरी स्रोतले बतायो ।जेठा छोरा मिलन र कान्छा प्रवीण पढ्नका लागि त्यहाँ २ वटा कोठा भाडामा लिएर बसेका थिए।

मिलन लोकसेवाको तयारी गरिरहेका र कान्छा प्रवीण विज्ञान संकायमा स्नातक पढिरहेका थिए। बाबु कुलप्रसाल जिल्ला हुलाक कार्यालय खोटाङका निमित्त प्रमुख (नायब सुब्बा) पनि हुन्। उनी एक साताअघि नै काठमाडौँ आएको खुलेको छ।