काठमाडौं । ललितपुरमा किशोरको हत्या आरोपमा तीन जना पक्राउ परेका छन् ।

पक्राउ पर्नेहरुमा च्यासल बस्ने २६ वर्षीय हेमराज भट्ट, काभ्रेका २२ वर्षीय जनकबहादुर तामाङ र दार्चुलाका ४१ वर्षीय पदमलाल भट्ट रहेका छन् ।

ललितपुर महानगरपालिका-९ च्यासलस्थित द टाउन क्याफेमा सुनसरीको इटहरीका २३ वर्षीय नयन गुरूङको हत्या भएको थियो ।

हत्या गरेको आरोपमा उक्त रेष्टुरेन्टमै काम गर्ने तीनै जना पक्राउ परेका हुन् । गुरूङमाथि तीन जना व्यक्तिहरूले कुटपिट तथा चक्कु प्रहार गरेको जिल्ला प्रहरी परिसर ललितपुरले जनाएको छ ।

उनीहरू मध्ये हेमराज भट्टले चक्कु प्रहार गरेको जनाइएको छ ।  घटना बिल तिर्ने विषयलाई लिएर भएको प्रहरी अनुसन्धानबाट खुलेको छ ।

घटनामा संलग्न व्यक्तिहरूसँग बिल तिर्ने विषयमा विवाद सुरू भएपछि चक्कु प्रहार हुन पुगेको प्रहरीले जनाएको छ।