वीरगञ्ज। किराना पसलमा अवैध लागूऔषध बेचबिखन गरेको आरोपमा सशस्त्र प्रहरी बलले एक जनालाई पक्राउ गरेको छ ।

सीमा सुरक्षा गुल्म वीरगंजबाट खटिएको टोलीले किराना पसलमा अवैध लागूऔषध बेचबिखन गरेको आरोपमा वीरगञ्जको प्रगतिनगरका राजाराम महतो कोइरीलाई पक्राउ गरेको हो ।

सीमा सुरक्षा गुल्म वीरगंज नं.१३ गण पर्सा, बिओपी सिर्सिया र वीरगंज भन्सार कार्यालयको संयुक्त टोलीले उनलाई पक्राउ गरेको हो ।

वीरगञ्ज–३ प्रगतीनगरमा उनले सञ्चालन गरेको सृष्टि किराना जेनरल स्टोरबाट लागूऔषध बरामद भएको थियो ।

पाँचवटा कार्टुनमा अवैध रुपले भण्डारण गरी राखिएको एक लाख ५१ हजार ८६० क्याप्सुल ट्रमाडोल हाइड्रोक्लोराइड नामक लागूऔषध बरामद भएको हो ।

स्टोर संचालक कोइरीलाई समेत वीरगंज भन्सार कार्यालय अगाडीबाट सशस्त्र प्रहरी बलले नियन्त्रणमा लिएको छ ।

नियन्त्रणमा लिइएका कोइरीलाई बरामद लागूऔषधसहित आवश्यक कारवाहीको लागि प्रहरीलाई बुझाइएको सशस्त्रले जनाएको छ ।