काठमाडौं । नेपाल प्रहरीका महानिरीक्षक बसन्तबहादुर कुँवरको ‘काउन्टडाउन’ सुरु भएको छ ।

अब उनको कार्यकाल ठिक सय दिन मात्र बाँकी छ। ३० वर्षे सेवाहदका कारण उनले आगामी ५ चैतमा अवकाश पाउनेछन्।

उनको अवकाशको मिति नजिकिदै गर्दा प्रहरीमा नयाँ नेतृत्वका लागि संघर्ष सुरु भइकसेको छ। नयाँ नेतृत्वका लागि तीन प्रहरी अतिरिक्त महानिरीक्षक(एआइजी)बिच प्रतिस्पर्धा छ ।

जसमा दिपक थापा, सुदिप गिरी र टेकबहादुर तामाङ छन् । एआइजी थापा हाल केन्द्रीय अनुसन्धान ब्यूरो (सिआइबी)मा कार्यरत छन् भने गिरी प्रहरी राष्ट्रिय प्रशिक्षण प्रतिष्ठानमा र तामाङ अपराध अनुसन्धान विभागमा कार्यरत छन् ।

उनीहरुमध्ये थापालाई नै भावी आईजीपीका रुपमा हेरिएको छ । कार्यक्षमतामा पनि अब्बल रहेका थापाको सबै राजनीतिक दलको नेतृत्वसँग सुमधुर सम्बन्ध रहेकाले पनि उनलाई सबैभन्दा बलिया दाबेदार मानिएको छ ।

एआइजी गिरीको पनि कांग्रेस नेताहरुसँग घनिष्ट सम्बन्ध छ । उनी त्यही सम्बन्ध प्रयोग गर्ने प्रयासमा छन् । एआइजी तामाङ भने खासै लबिइङमा लागेका छैनन् ।

अहिलेकै प्रावधानअुनसार उनीहरुमध्येबाट ६ महिनाका लागि आईजीपीमा नियुक्त हुनेछन् । अर्कोतर्फ ३० वर्षे सेवाहद हटाउने सम्बन्धि प्रहरी ऐनको मस्यौदा पनि मन्त्रिपरिषद् पुगिसकेको छ ।

यदी संसदको हिउँदे अधिवेशनबाटै प्रहरी बिधेयक पास भएमा भने अहिलेकै आईजीपीको कार्यकाल लम्बिने सम्भावना समेत छ । नेपाल प्रहरीमा सामान्यता अन्तिम दिन आएर आईजीपी बढुवाको निर्णय हुने गर्दछ ।

जसकारण अत्याधिक चलखेल हुने भएकाले चलखेल पनि धेरै हुने गरेको छ । नेपाली सेनामा जस्तै अवकाशको एक महिनाअघि नै प्रमुख बिदामा बस्ने र नयाँ नेतृत्व अघि बढाउनुपर्ने माग प्रहरीमा पनि उठेको छ।