काठमाडौं । नेपाली कांग्रेसका महामन्त्री विश्वप्रकाश शर्माले जन्ममितिका आधारमा दल पुरानो नहुने बताएका छन् ।

बिहीबार कीर्तिपुरमा आयोजित चुनावीसभामा बोल्दै उनले यस्तो बताएका हुन् । उनले पुरानाको दिन गए भन्नेले धर्ती आफैँ पुरानो हो भन्ने नबिर्सिन चेतावनी दिए ।

“पुरानाका दिन गए भनेर दलहरूको पद्धतिविरुद्धमा जाने मनोविज्ञानसँग हामी सहमत छैनौँ । पुरानोका दिन गए भन्ने साथीहरूले बिर्सिएका छन्, यो पृथ्वी आफैँमा पुरानो हो । यो धर्ती आफैँमा पुरानो हो । हामीले बोकेका धर्म ग्रन्थ, देश, कीर्तिपुरको माटो पुरानो हो,” उनले भने, “कुनै पनि भूगोल, कुनै पनि दल, कुनै पनि व्यक्ति, कुनै पनि विचार जन्ममिति पुरानो भएकाले पुरानो हुँदैन । वर्ल्ड इज, गोल्ड भनिन्छ ।”

उनले रास्वपा लक्षित नयाँ भन्दैमा असल नहुने टिप्पणी गरे ।