काठमाडौं । कोशी प्रदेशका आन्तरिक मामिला तथा कानुन मन्त्री लिलाबल्लभ अधिकारी नै मानवतस्करीमा मुछिएपछि राजीनामा दिएका छन् ।

मुख्यमन्त्रीलाई समेत जानकारी नदिई यही कात्तिक १३ गते जापान उडेका मन्त्री अधिकारी १७ गते नेपाल फर्किएका थिए ।

उनीसँगै नक्कली कर्मचारी बनेर केही युवा जापान भएको विषय बाहिर आएपछि उनले बुधबार मुख्यमन्त्रीलाई राजीनामा पत्र बुझाएका हुन् ।

मन्त्रीसँग अन्य व्यक्तिहरू जापान गएको सूचना पाएपछि मुख्यमन्त्री हिक्मतकुमार कार्कीले बुधबार बिहान निवासमै बोलाएर राजीनामा दिन निर्देशन दिएका थिए ।

यो प्रकरणमा मन्त्रालयकै कर्मचारी भएर जापान जाने तीन जनासहित ६ जना पक्राउ परेका छन् । उनीहरूविरुद्ध लिखतसम्बन्धी कसुरमा अनुसन्धान भइरहेको बताइएको छ ।

अपराध अनुसन्धान कार्यालय टेकुले उनीहरूलाई नियन्त्रणमा लिएर प्रारम्भिक अनुसन्धान गरेको थियो ।

अनुसन्धान कार्यालय टेकुका प्रवक्ता एसपी काजी आचार्यका अनुसार पक्राउ पर्नेमा रसुवाका कञ्चन देवकोटा र दावा सेर्पा र जनक राई रहेका छन् ।

सेर्पा र राई खोटाङका हुन् । कात्तिक १४ मा मन्त्री सहित उनीहरूलाई टोकियोस्थित जापानको अध्यागमन कार्यालयले डिपोर्ट गरेको थियो ।