काठमाडौं । सरकारी वकिलले पैसा लिएको भिडियो खिचेर पैसा माग्ने एक युवक पक्राउ परेका छन्।

गोरखा घर भइ कपन बस्ने अश्विन दानीलाई उपत्यका प्रहरी कार्यालयले पक्राउ गरेको हो । उनीविरुद्ध अपाराधिक लाभ मुद्दामा प्रहरीले कारबाही अघि बढाएको छ ।

प्रहरी स्रोतका अनुसार उनले केही हप्ताअघि नुवाकोटका एक सरकारी वकिलले पैसा लेनदेन गरेको भिडियो गोप्य रुपमा खिचेका थिए ।

घुस लिएको भनेर सार्वजनिक गरिदिने भन्दै उनले १२ लाख मागेका थिए । तिनै सरकारी वकिलको उजुरीका आधारमा दानी पक्राउ परेका हुन् ।

आफुलाई पत्रकार बताउने दानी यसअघि चोरी मुद्दामा पक्राउ परेको समेत खुलेको छ ।

यसअघि मुगा माला, टल्कने पत्थर लगायतका बहुमुल्य बस्तु ठगी गरेको आरोपमा गोरखा नगरपालिका–३ नारेश्वरका २३ बर्षीय अश्विन दानी पक्राउ परेका थिए । उनलाई जिल्ला प्रहरी कार्यालय नुवाकोटले पक्राउ गरेको थियो ।

दानी गोरखाबाट हिमालय टेलिभिजनको संवाददाता रहेको खुलेको छ । उनी विभिन्न शक्तिशाली व्यक्तिहरुसँग खिचेको तस्विर सामाजिक सार्वजनिक गर्ने व्यक्ति हुन् । उनले त्यही प्रभावमा तस्करी गर्दै आएको खुलेको त्यतिबेलै खुलेको प्रहरीको दावी छ ।

प्रहरीका अनुसार गत फागुन ३० गते मुगा माला र टल्कने पत्थर किन्न भन्दै उनीहरु नुवाकोटको बिदुर नगरपालिका–७ महादेवखर्कस्थित चन्द्रबहादुर तामाङको घरमा पुगेका थिए ।

घरमा पुगेर सामान हेरेपछि ३५ लाखमा किन्ने फाइनल डिल गरेर अन्त्यमा पैसा नदिई सामान लिएर भागेका थिए ।