काठमाडौं । अख्तियार दुरुपयोग अनुसन्धान आयोगको टोलीले तारकेश्वर नगरपालिकामा कार्यरत अमिन ईश्वर चन्द्र चौलागाईलाई घुससहित पक्राउ गरेको छ ।

अमिन चौलागाईलाई सेवाग्राहीसँग जग्गा कित्ताकाटको सिफारिसका लागि २० हजार घुस लिइरहेको अवस्थामा नियन्त्रणमा लिइएको हो ।

अख्तियारका सहायक प्रवक्ता देवी प्रसाद थपलियाका अनुसार चौलागाईले जग्गा कित्ताकाट सिफारिस गर्न सेवाग्राहीसँग घुस माग गरिरहेको भन्ने उजुरीको आधारमा टोली खटिएको थियो ।

काठमाडौं जिल्ला अन्तर्गत तारकेश्वर नगरपालिका ६ धर्मस्थलीमा चौलागाईले सेवाग्राहीसँग २० हजार रुपैयाँ लिइसकेको अवस्थामा नियन्त्रणमा लिइएको उनले बताए ।

टोलीले सोही स्थानबाट थप ३४ हजार रुपैयाँ श्रोत नखुलेको रकम समेत बरामद गरेको छ। अख्तियारका अनुसार चौलागाईमाथि हाल थप अनुसन्धान जारी छ ।