काठमाडौं । आईसीसी विश्वकप क्रिकेट लिग–२ अन्तर्गत त्रिदेशीय शृंखलाको पहिलो खेलमा नेपाल क्यानडासँग पराजित भएको छ ।

सोमबार राति क्यानडाको किंग सिटीमा भएको खेलमा नेपाललाई घरेलु टिम क्यानडाले १०३ रनले पराजित गरेको हो । खेलमा क्यानडाले प्रस्तुत गरेको २५४ रनको लक्ष्य पछ्याउने क्रममा नेपाल ४०.१ ओभरमा १५० रनमै समेटियो ।

क्यानडाविरुद्ध नेपालका कुनै पनि ब्याटर चल्न सकेनन् । नेपाली टिमका लागि करण केसीले सर्वाधिक २७ रन, सन्दीप लामिछानेले २२, आसिफ सेखले २०, भीम सार्कीले १८, गुल्सन झाले १५ र कुशल मल्लले १२ रन थपे ।

नेपाललाई सस्तैमा समेट्न क्यानडाका डिलोन हेलिगरले पाँच विकेट लिए । त्यसअघि टस हारेर ब्याटिङमा आएको क्यानडाले कप्तान निकोलस किर्टोनको आक्रामक ब्याटिङमा २५३ रनको योगफल खडा गरेको थियो ।

नेपालका करण केसी र ललितनारायण राजवंशीले समान दुई विकेट लिए । सन्दीप लामिछाने, गुल्सन झा र रोहित पौडेलले एक–एक विकेट हात पारे । लिग–२ मा पाँचौं खेल खेलेको नेपालको यो चौथो हार हो ।