काठमाडौं । नेकपा माओवादी केन्द्रका सांसद शक्ति बस्नेतले जनयुद्धलाई हिंसा भन्नु विस्तृत शान्ति सम्झौताको विपरीत भएको बताएका छन् ।

प्रतिनिधिसभाको आजको बैठकमा बोल्दै सांसद बस्नेतले यस्तो बताएका हुन् ।

उनले जनयुद्धलाई हिंसा भन्दै विस्तृत शान्ति सम्झौता र संविधानविपरीत नेकपा एमालेका सांसद योगेश भट्टराईले अभिव्यक्ति दिएको बताए ।

सांसद बस्नेतले भने, ‘जनयुद्धलाई माओवादी हिंसाको रुपमा चित्रण गर्ने कोसिस भए, यो राजनीतिक मूल्य, नैतिकता र संवैधानिक निष्ठाको दृष्टिले अनुपयुक्त छ ।’

सांसद बस्नेतले भट्टराईको अभिव्यक्तिप्रति आपत्ति जनाए। जनयुद्धलाई विस्तृत शान्ति सम्झौता, संविधानले सशस्त्र संघर्ष भनेर चिन्ने सांसद बस्नेतले बताए ।

सांसद बस्नेतले सत्तारुढ दलका सांसदहरूबाट नै १० वर्षे माओवादी नेतृत्वको जनयुद्धलाई अमपानित हुनेगरी विचारहरू व्यक्त हुनु दु:खद भएको बताए।

जनयुद्धलाई संविधानले सशस्त्र द्वन्द्वको रुपमा परिभाषीत गरेको भन्दै उनले उक्त तथ्यलाई सत्तापक्ष दलका सांसदहरूले उपेक्षा गर्दै जनयुद्धलाई हिंसाको रुपमा व्याख्या गर्ने काम उपयुक्त नभएको जिकिर गरे।