बाँके । जिल्ला अदालत बाँकेले वडाध्यक्षसहित पाँच जनालाई पुर्पक्षका लागि थुनामा पठाउन आदेश दिएको छ ।

बाँकेमा दुई युवामाथि खुकुरी प्रहार गरेको घटनामा न्यायाधीश दीपक घिमिरेको एकल इजलासले उनीहरुलाई थुनामा पठाउन आदेश दिएको हो ।

थुनामा रहेका राप्ती सोनारी गाउँपालिका–२ का वडाध्यक्ष ३८ वर्षीय ज्ञानु भनिने ज्ञानेन्द्रराज ओलीसहित चार जनालाई पुर्पक्षका लागि थुनामा पठाउन आदेश दिइएको अदालतले जनाएको छ ।

अदालतका अनुसार राप्ती सोनारी– २ का ३२ वर्षीय सन्दिप ओली, ३२ वर्षीय रत्न भण्डारी, ३७ वर्षीय लोकेन्द्र भनिने लोकबहादुर डाँगी र नेपालगञ्ज उपमहानगरपालिका–६ का ३१ वर्षीय बाला भनिने सन्तोष गुप्तालाई पुर्पक्षका लागि थुनामा पठाउन आदेश दिएको हो।

बाँकेको राप्ती सोनारी गाउँपालिका–५ बिनौना चोकमा भदौ १ गते शनिबार बेलुकी करिब साढे ७ बजेतिर राप्ती सोनारी–२ का २८ वर्षीय सन्दिप विष्ट र बैजनाथ–७ प्रशुरामपुरका २८ वर्षीय सुलभ मल्लमाथि एक समूहले आक्रमण गरेको थियो । भारतको लखनउमा दुई जना घाइतेको उपचार भइरहेको छ।