काठमाडौं । काठमाडौंको टुँडिखेलमा आयोजित गौरा पर्वमा प्रधानमन्त्रीविरुद्ध नाराबाजी गर्दा पक्राउ परेकाहरू रिहा भएका छन् ।

रिहा हुनेमा कन्चनपुरका दीपक सिंह ठगुन्ना, सुर्खेतका गोपीराज जैसी र अछामका रामबहादुर बुढा रहेका छन् ।

सुदूरपश्चिममा मनाइने गौरा पर्व भदौ १० मा काठमाडौंको टुँडिखेलमा मनाइएको थियो । सोही कार्यक्रममा प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवा समेत सहभागी थिए ।

सोही क्रममा गौरा खेल्न पुगेका युवाहरूले प्रधानमन्त्री ओली र कांग्रेस सभापति देउवाविरुद्ध नाराजुलुस गरेका थिए । उनीहरुले केपी चोर, देश छोड जस्ता नारा लगाएका थिए ।