काठमाडौं । गोरखाको चुमनुब्री गाउँपालिकामा अवस्थित चुमभ्यालीबाट प्रकाश तामाङ (काले मोक्तान) बिदाइ भएका छन् ।

चुमभ्यालीमा तीन दशकभन्दा बढी बिताएका प्रकाश बिहीबार भोजपुरका लागि हिँडेका हुन् । उनी काठमाडौँ हुँदै भोजपुर जानेछन् ।

उनलाई जनप्रतिनिधि, साहूलगायतले खादा लगाएर बिदाइ गरे । ‘हेर्ने कथा’ को ‘हराएका वर्ष’ नामक कथा प्रकाशन भएपछि प्रकाश चर्चामा छन् ।

प्रकाशलाई साहू टासी लामाले पारिश्रमिकस्वरूप १० लाख दिने भएका छन् भने गाउँपालिकाले १ लाख रूपैयाँ दिनेछ । प्रकाश काठमाडौँ पुगेर प्रधानमन्त्री केपी शर्मा ओलीलाई भेट्ने बताइएको छ ।

प्रधानमन्त्री ओलीले तामाङलाई केही दिनभित्रै नागरिकता दिलाउन निर्देशन दिइसकेका छन् ।