काठमाडौँ । नेकपा (एकीकृत समाजवादी) केन्द्रीय कमिटीको बैठक बिहीवार आह्वान गरिएको छ । नयाँ बानेश्वरस्थित अर्पण बैंक्वेटमा बिहान ११ बजेका लागि बैठक बोलाइएको हो ।

बैठकमा पार्टीको केन्द्रीय संरचना निर्माण र विविध विषयमा छलफल हुनेछ । यस्तै बैठकमा नेताहरूको योगदान, कार्यक्षमताका आधारमा स्थायी समिति, सचिवालय गठनलगायत विषयमा छलफल गरी केही नेताहरुको जिम्मेवारी हेरफेर गरिने बताइएको छ ।

पार्टीमा तीन सय ४४ सदस्यीय केन्द्रीय कमिटीको व्यवस्था गरिएको छ। केन्द्रीय कमिटी सदस्यहरूलाई अनिवार्य उपस्थितिका लागि निर्देशन दिइएको छ।

केन्द्रीय पदाधिकारीमा निर्वाचित हुन नसकेका नेतालाई व्यवस्थापन गर्ने, केही नेताहरुलाई विभाग तथा आयोगमा समेट्ने जनाइएको छ।