काठमाडौं । नेपाली कांग्रेसका नेता कृष्णप्रसाद सिटौलाले कांग्रेस र एमालेबीच भएको संविधान संशोधनको बुँदाले धेरैलाई तरंगित बनाएको बताएका छन् ।

नेपाली कांगेसको गत साउन २३ देखि जारी केन्द्रीय समिति बैठकमा शुक्रबार नेता सिटौलाले सो कुरा बताएका हुन् ।

उनले संविधान संशोधनमा प्रवेश गर्नुअघि कार्यान्वयनको समीक्षा गर्न प्रस्ताव गरे । कार्यान्वयनको समीक्षाबिनै संशोधनमा प्रवेश गरे त्यसले दुर्घटनामा पुर्‍याउने चेतावनी उनको छ ।

“कांग्रेस र एमालेबीचको सात बुँदे सहमतिमा रहेको संविधान संशोधनको बुँदाले धेरैलाई तरंगित बनाएको छ,” सिटौलाले भने, “त्यस्तो तरंग पार्टीभित्र पनि छ र पार्टीबाहिर पनि छ । देशभित्र स्वभाविक चासो छँदैछ । देश बाहिर पनि छ ।”

उनले यो तरंगले सकारात्मक संकेत नगरेको भन्दै त्यही कारण सचेत हुन जरुरी रहेको बताए ।