काठमाडौं । तनहुँको आँबुखैरेनीस्थित ऐनापहारा नजिकै भएको बस दुर्घटनामा गम्भीर घाइते भएका १६ जनालाई उपचारका लागि काठमाडौं ल्याइएको छ ।

नेपाली सेनाको हेलिकप्टरमार्फत दुई पटक गरेर १६ जनालाई उपचारका लागि काठमाडौं ल्याइएको हो ।

दुर्घटनामा चालकसहित ४३ जना परेको र सबैको उद्धार भइसकेको छ । दुर्घटनामा १८ जनाको मृत्यु भएको पुष्टि भइसकेको छ।

पहिलो पटक १२ र पछिल्लो पटक ४ जना गरी १६ जनालाई थप उपचारका लागि काठमाडौं शिक्षण अस्पताल ल्याईएको थियो ।

घाइतेहरूको महाराजगञ्जस्थित त्रिवि शिक्षण अस्पतालमा उपचार भइरहेको छ।

गोरखपुरबाट केशरवानी परिवहन ट्राभल्सको यूपी ५३ एफटी ७६२३ नम्बरको बस भदौ ४ गते बेलहिया नाकाबाट ८ दिनको रुट परमिट लिएर नेपाल भित्रिएको थियो ।

पर्यटकलाई भैरहवाबाट पोखरा पुर्‍याएर काठमाडौं ल्याउँदै गर्दा बस सडकबाट मस्र्याङ्दी नदी किनारमा खसेको हो ।

यूपी ५३ एफटी ७६२३ नम्बरको बस तनहुँको ऐनापहरा भन्ने स्थाननजिकै मस्र्याङ्दी नदीमा खसेको थियो ।

बसमा ४१ जना यात्रु, एक जना चालक र एक जना सहचालक थिए। उनीहरू सबै भारतीय नागरिक भएको प्रहरीले जनाएको छ।