काठमाडौं । सरकारले नेपाल पनि मंकिपक्स (एम्पक्स) संक्रमणको जोखिममा रहेकाले सतर्कता अपनाउन अनुरोध गरेको छ ।

आइतबार एक विज्ञप्तिमार्फत स्वास्थ्य तथा जनसंख्या मन्त्रालयले एम्पक्स संक्रमणविरुद्ध पूर्वतयारी थालिसकेको जानकारी दिँदै सो अनुरोध गरेको हो । मन्त्रालयका अनुसार, हवाई तथा जमिनका नाकाहरूमा रहेका हेल्थ डेस्क स्थापना गरिएको छ ।

‘सरुवा रोगको निगरानी सर्विलेन्स गर्ने तीनै तहका निकायहरूलाई सतर्क गराइसकेको र सबै प्रदेशमा यस रोगको निदान तथा व्यवस्थापनका लागि अस्पताल र चिकित्सक तोकिसकेको जानकारी गराउन चाहन्छौँ,’ मन्त्रालयले भनेको छ ।

मन्त्रालयबाट पूर्वतयारी प्रतिकार्य र व्यवस्थापन भए पनि आमनागरिकबाट जनस्वास्थ्यका मापदण्ड पालना भए मात्र मंकिपक्सको रोकथाम र नियन्त्रणका लागि सम्भव हुने भएकाले सबैलाई जनस्वास्थ्यका मापदण्ड पालना गर्न आग्रह गरिएको छ ।