काठमाडौं । पेरिस ओलम्पिक-२०२४ को ब्याडमिन्टनमा नेपालका प्रिन्स दाहाल पराजित भएका छन्।

फ्रान्सको पेरिसस्थित ला चापेला एरिनाको कोर्टमा भएको समूह ‘पी’ को आफ्नो पहिलो खेलमा विश्व वरीयताको दोस्रो स्थानमा रहेका डेनमार्क भिक्टर एक्सेल्सेनले प्रिन्सलाई २-० को सोझो सेटमा पराजित गरेका हुन्।

कठिन समूहमा रहेका प्रिन्सलाई भिक्टरले २१-८ र २१-६ ले हराए । प्रिन्सको समूहमा उनी र भिक्टरसहित ४ खेलाडी छन् ।

प्रिन्सले जुलाइ २९ तारिखमा आयरल्यान्डका निहात गुयेन तथा जुलाइ ३१ मा इजरायलका मिसा जिल्बरम्यानसंग खेल्ने छन् ।

विश्व वरीयतामा निहात ४३ औं तथा मिसा ५८ औं स्थानमा छन्।

नेपालमा भएको १३औं सागमा २ कांस्य पदक जितेका राष्ट्रिय च्याम्पियन प्रिन्स पूर्वजुनियर विश्व नम्बर वान खेलाडी हुन् ।