गोरखा । उत्तरी गोरखाको धार्चे गाउँपालिका-५ को रेसेफाँटमा लेदो सहितको पहिरोमा परी पाँच जना बेपत्ता भएका छन्।

शनिबार रातिको पहिरोमा परी कान्छी गुरूङ, जीतबहादुर गुरूङ, रमेश गुरूङ, रमेश परियार बेपत्ता भएका छन्।

जीतबहादुर गुरुङको कृषि फर्म र एक घर पहिरोले बगाएको हो । बेपत्ता हुनेमा एकै घरपरिवारका तीन जना र बाँकी दुई जना त्यही फर्ममा काम गर्ने रहेको जिल्ला प्रहरी कार्यालय गोरखाले जनाएको छ ।

अन्य दुई जनालाई भने घाइते अवस्थामा उद्धार गरिएको छ । उद्धार हुनेमा सिङ्लाका ३५ वर्षीय दिलिप गुरुङ र २७ वर्षीय थमबहादुर गुरुङ रहेका छन् ।

उनीहरुमध्ये दिलीपको अवस्था गम्भिर रहेको र थप उपचारका लागि नेपाली सेनाको हेलिबाट काठमाडौं लैजाने तयारी भइरहेको प्रहरीले जनाएको छ ।