एजेन्सी । महाराष्ट्रको गडचिरोलीमा प्रहरीसँगको भिडन्तमा १२ माओवादी मारिएका छन् । भिडन्त छत्तीसगढ र महाराष्ट्रको सीमा क्षेत्रमा भएको हो।

गडचिरोलीको झारवण्डी थाना अन्तर्गत छिन्दभट्टी र छत्तीसगढको बन्दे काँकेर थानाको बिचको जंगलमा बुधबार दिउँसो १:३० देखि २ बजेसम्म प्रहरी र माओवादीको बटालियनबिच भिडन्त भएको थियो ।

भिडन्तमा एक प्रहरीलाई पनि गोली लागेको बताइएको छ । दिउँसो सुरु भएको भिडन्त साँझसम्म जारी रहेको थियो ।

छत्तीसगढ प्रहरीले जारी गरेको विज्ञप्तिमा भनिएको छ, ‘दुवै पक्षबिच ६ घण्टासम्म गोली हानाहान भएको थियो । त्यसपछि उक्त क्षेत्रमा खोजी गरिएको थियो । खोजीका क्रममा हालसम्म १२ माओवादीको शव बरामद भएको छ । यसका अलावा ३ एके ४७ थान, एक कार्बाइन, एक एसएलआरसहित सात वटा स्वचालित हतियार पनि बरामद गरिएको छ ।’

महाराष्ट्रका उपमुख्यमन्त्री देवेन्द्र फनाविसले पनि माओवादीसँगको भिडन्तमा १२ नक्सलवादी मारिएको जानकारी दिएका छन् ।

महाराष्ट्र सरकारको तर्फबाट उनले गडचिरोली प्रहरीलाई ५१ लाख रुपैयाँ पुरस्कार दिने घोषणा गरेका छन् ।