प्युठान । स्वास्थ्यकर्मीको सेवा स्वास्थ्य संस्थामा वा बाहिर पनि ? उत्तर पक्कै बाहिर पनि भन्ने नै आउँछ । अनि बाहिर जाँदा स्वास्थ्य सरोकारकै अथवा अरू ?

यसमा पनि स्वास्थ्य सरोकारकै भन्ने आउँछ तर प्युठानको मल्लरानी गाउँपालिका–३, धरमपानीमा रहेको स्वास्थ्य चौकीका स्वास्थ्यकर्मीले भने बिरामीलाई बोकेर घर लगिदिने सेवा पनि दिएका छन् ।

यति मात्र होइन पोसाकसहितका स्वास्थ्यकर्मीले सुत्केरीलाई बोकेर घरसम्म लैजाँदा बाटामा कसैले उनीहरूलाई सहयोग गरेनन्, रमिता मात्र हेरिरहे ।

घटना विवरण अनुसार ऐरावती गाउँपालिका–६, काल्ने प्युठानकी ३० वर्षीया जीवा विक सुत्केरी व्याथाले च्यापेपछि धरमपानी स्वास्थ्य चौकी पुगिन् । उनी तीन वर्षको छोरो र आमासहित राति ८ बजे स्वास्थ्य चौकीमा पुगेकी थिइन् । उनले त्यसै राति करिब १० बजे सामान्य अवस्थामा छोरीलाई जन्म दिइन् ।

सुत्केरी भएको २४ घण्टासम्म आराम गरेपछि स्वास्थ्यकर्मीले उनलाई घर जान सल्लाह दिए । तर पानी परिरहेकाले बाटो अवरुद्ध थियो ।

गाडी चलेका थिएनन् । उनी आफैँ हिँडेर जान पनि सक्दिनथिन् । अनि उनलाई घरसम्म बोकेर लैजाने सहयोगी कोही पनि थिएनन् ।त्यसपछि स्वास्थ्यकर्मीले नै स्ट्रेचरमा बोकेर उहाँको घरसम्मै पु¥याइदिए । गोरखापत्रबाट