एजेन्सी । भारतको नयाँ दिल्लीका मुख्यमन्त्री अरविन्द केजरीवाललाई जमानत दिने तल्लो अदालतको आदेशमाथि दिल्लीस्थित उच्च अदालतले रोक लगाएको छ ।

उच्च अदालतले प्रवर्तन निर्देशनालय (ईडी) को याचिकामा दुईदेखि तीन दिनमा आदेश सुनाउने बताएको छ ।

इडीले दिल्ली अन्तःशुल्क नीतिसम्बन्धी सम्पत्ति शुद्धीकरण मुद्दामा मुख्यमन्त्री केजरीवाललाई जमानत दिने अदालतको आदेशलाई चुनौती दिएको हो।

ईडीले केजरीवाललाई नियमित जमानत दिने आदेशमा आफूलाई सुनुवाइको पर्याप्त अवसर नदिई र हालको मुद्दाको तथ्यलाई ध्यान नदिई आदेश दिएको बताएको छ । सम्पत्ति शुद्धीकरण मुद्दामा ईडीले केजरीवाललाई मार्च २१ मा पक्राउ गरेको थियो।